بطفولتي بما اني حجازية كنت اقول على اللون الوردي بمبي
و بما اني كنت ساكنه بالشرقية فكانوا يقولوا على الوردي وردي او زهري
اذكر هذا الصوت بقوة واذكرة بوضوح وأثر عليا فتره طويلة من حياتي
باحد صفوفي بالإبدائية " كان في لوحة باللون الوردي او البمبي بالفصل "
فاكتشفوا البنات ان اقول على هذا اللون بمبي " وصارت زي اللعبه عندهم كل مايبغوا يضحكوا يسالوني ايش هذا اللون "
بالبداية توقعت الموضوع عادي مره مرتين كلمة جديده عليهم بعدين صارت هذي الكلمة فكاهه الفصل و وقفت اقولها لما عرفت ان الموضوع تحول استهزاء و ماصرت اتجاوب معاهم .. بعدها اعتذروا ليا وقالولي ترانا نمزح لاتزعلي .. حقيقي كانت نيتهم طفوليه عفويه من باب المزح
بس اثرها عليا عالي جدا خلاني انتبه من بعض الكلمات الي متعودة عليها من اهلي ماقولها بمجتمع مختلف عنهم
سؤالي لكم اصدقائي كم موقف ببالك يشبه كذا ؟!!
كم كلمة احد قالها لك مأثرة وممكن موقفه وممكن خافظة عزيمتك وممكن مربكة ثقتك و ممكن فقط تهزك بين فتره و الثانيه ...
كلنا مرينا بظروف مشابهه بطفولتنا و حتي بكبرنا تحت إطار ......
" ترانا نمزح .. لاتصير حساس ... لايصير دمك ثقيل .. عيب تزعل ... مايزعل "
حقيقي الى متى !!!!!
كل شخص مر عليه هذا الموقف يعرف حجم الالم النفسي الي يعاني منه عشان يتجاوز
اليوم رسالتي لك
خلي هذي الحركة توقف عندك لو كل شخص اتخذ قرار يوقف هذا النوع من الاستهزاء والتنمر عنده بتخف بصورة كبيرة بإذن الله
هذا النوع " الضحك من خلال الاستهزاء وتراني امزح " وحدة من انواع الضحك الغير صحي المنتشر بعالمنا ..!!!!!
هلا فعلا الموضوع يضحك لهدرجة .....؟!!!
هل فعلا محتاجين الضحك لدرجة تستمتع بالضحك على بعض .....؟!!!
هل فعلا فقراء للضحك لدرجة نإذي احد عشان نضحك .....؟!!!
هل فعلا الضحك مشوه عندنا عشان نسمي هذا ضحك .....؟!!!
ارجوك صديقي فكر اكثر من مره بكلامي واقراءة مره ومرتين واذا عندك وجه نظر مختلفه احب اسمعها منك
ساعدني انشر هذي الثقافه " ثقافة الضحك الصحي " بمجتمعنا من خلال نشرك لهذا المقال
لان هذي وحدة من نواياي الكبيرة برحلتي لتعليم الضحك و يوجا الضحك
واكيد بأكمل معاكم الايام الجايه عن موضوع الضحك الصحي والغير صحي عشان يستحق أكثر من مقال لأتعمق به
انتظروني ..
شكراً لقراءتك ووصولك هنا
عهد